Lee Staples

Aazhoomog gii-ondaadizi a'aw Obizaan Maadaginzod Binaakwii-giizis, Ashi-zhaangaswi niimidana ashi-naanan gikinoonowin naash gii-ishkwaa-ayaa Onaabani-giizis ingodwaasogonagizid Niishtana niishtana ashi-naanan gikinoonowin imaa endaad. A'aw Ajidawaashiikwe Nancy Churchill-Staples naa August Staples Sr., mii iniw owawiinge-gitiziiman. Ogii-nitaawigi'igoon idash Nazhikewigaabawiikwe Sophia Churchill-Benjamin naash Ogimaawab John Benjamin, mii iniw ogitiziiman.

Izhi-mikwendaagozi a'aw Obizaam a'aw Maakawaadizid, gii-kanawendamaage iniw gimishoomisinaan, gii-midewi'iwe, gii-wiiyawen'enkaage nebowa, odayaawaan awashime naanwaak iniw owiiyawen'enyan, gii-gikinoo'amaage gidinwewininaan, gii-maajaa'iwe, ogii-ozhibii'aan nebowa da-gikinoo'amaagozinid anishinaaben niigaan, niswi iniw mazina'iganan, biinish nebowa ogii-ozhibii'aanan imaa anooj babaamaajimo-mazina'iganing, biinish gaye gii-o-naadamaaged aaniin go apii gaa-kagwejimind wenjida gii-asemaakawind. Moozhag ogii-kagaanzomaan anishinaaben da-mino-bimaadizinid, da-minawaanagozinid, weweni da-doodawaad iniw wiij'anishinaabeman biinish gaye da-nanda-mikamonid wenji-asigonid iniw manidoon omaa akiing. Gego aanizhiitangen. Weweni bizindaw. Gii-nibwaakaa.

Oga-nagishikawaan iniw odinawemaaganan gaa-minjinawezid, iniw ogitiziiman, ozigosiban, owiij'aya'aan Waabishkigaabawiikwe Mrs. Joe (Delphine) Shabaiash naa Enabiitang Bernard Benjamin, nebowa iniw odinawemaaganan biinish gaye nebowa iniw owiiyawen'enyan.

Ogii-waangoomaan Ombishkebines, Waasegiizhigookwe, Niizhwaasanangookwe, Bimise Jiigibiig Ikwe, biinish gaye iniw oniijaanisiwaan. Mii iniw enawemaajin. Ozaagi'aan gakina iniw owiiyawen'enyan igaye.

Da-nanaa'inigaazo Maadanokii-giizhigak Niizhwaasogonagizid Onaabani-giizis iwidi Odaawaa-zaaga'iganiing, imaa gaa-taad Biidaabanookwe, the late Saxon St. Germaine residence.

Owii-mikwaamaan iniw wesadawendamonijin, nebowa iniw odinawemaaganan gayat gii-aanjikiiwan. Geget da-minawaanigozi a'aw Obizaan dagoshimoonod. Oga-waawaabamaan iniw odinawemaaganan gaa-minjinawezid gewiin. Mikwendan ogii-kiizhiikaan nebowa gaa-onji-asind megwaa gii-pibizhaagiid omaa akiing, mii aangwaamasidog da-anwebi. Geget aanoodizi da-maada'adood.

"Mikwendan ingoding giga-waabamininim miinawaa." Obizaan

Floral arrangements made by Austin Lake Greenhouse in Webster, WI.